Info før cupfesten mot Brann!

Tysdag 12. mai møter me Brann i 2. runde av NM! Då vil me skape ein skikkeleg publikumsfest, og lage best moglege rammer rundt kampen! Her kjem diverse informasjon om arrangementet!

Programmet for dagen byrjar allereie kl. 16:30, og me håpar å sjå mange på plass allereie då! Me fyrer opp grillen, og byr på nydeleg grillmat for både store og små. Ta middagen på Fosshaugadn denne dagen, og lad opp til ein skikkeleg publikumsfest!

Billettar

Alle som har kjøpt sesongkort for 2026-sesongen kan nytte dette også til NM-kampane. Det er framleis mogleg å sikre seg sesongkort, og ein kan lese meir om korleis her på heimesida. Det øvrige billettsalet føregår på same måte som i seriekampane. Ein kjøper billett gjennom Vipps og merkar betalinga med kampen det gjeld. Vippsnummeret er #734888. I inngangen syner ein bekrefting på betalinga, og nyttar denne som gyldig billett.

Det kostar 100,- for vaksne, medan alle barn under 16 år kjem inn gratis. Alle russ/VGS-elevar har gratis inngang på Lerumtribuna, altså kortsida saman med Saftkokaradn (Inngang 3). Me håpar å sjå mange supportarar på kamp!

Parkering

Det er god plass til parkering i områda rundt Fosshaugane Campus. Ein vil finne både parkeringsplassar og parkeringshus i kort gåavstand til stadion. Parkering på Lunnamyri ligg like ved Fosshaugadn og gir kort veg til inngang 1 og 4, medan P-Hus Lines og P-Hus Eplekjellaren er dei næraste alternativa for inngang 3. Meir detaljert informasjon om kvar ein kan parkere finn ein her!

Bortesupportarar

Me ønskjer tilreisande supportarar hjarteleg velkommen til Sogndal, og håpar mange tek turen for å bidra til ei flott ramme rundt kampen! Bortesupportarar nyttar inngang 4, og følgjer merkinga til bortefeltet som vist på biletet over. Pris for billettar på bortefeltet er 100,- for vaksen, og gratis for alle under 16 år. (Vipps til #734888). Det vil bli sal av grillmat i området ved inngangen frå kl. 16:30, og eigen kiosk med enkel servering på bortefeltet. Me gler oss til å ta i mot dykk, og i Sogndal er det sjølvsagt lov å nytte tromme utan at det blir dårleg stemning!

Fanzone

Etter kamp blir det Fanzone i hjørnet utanfor Bakkeplassen (sjå biletet over). Her kan unge supportarar møte spelarane våre etter kampen. Det blir moglegheit for å sikre seg autografar, splitter nye og eksklusive fotballkort eller ein selfie med spelarane!

Det blir også kjekke konkurransar på tribuna, der ein kan vinne både pengar og billettar til ViteMeir. Me trekkjer ut eit tilfeldig lag som heldige vinnarar av 5000,- til lagskassa, og det vil i tillegg bli premie til den mest kreative heiagjengen! Ein kan lese meir og melde seg på her!

Før kampstart kjem jentene til å skyte fotballar opp på tribuna. Alle som får tak i ein ball får vere med på ein konkurranse ute på bana i pausen! Her er det berre å vere årvåken og klar allereie før kampstart!

Me gler oss til cupfest på Fosshaugadn, og håpar de er klare for å gjere dagen minnerik både på og utanfor bana! Velkommen!