Fotballdag for jenter i Måløy!

I dag har me vore så heldige å få vere med Måløy FK å arrangere fotballdag for jenter. Vel 70 jenter i alderen 6-15 år fekk seg ei god treningsøkt med spelarar frå Sogndal FK Damer som trenarar. Treningane gjekk føre seg på Skavøypoll stadion og i Nordfjordhallen, med spelarar frå Skavøypoll IL, Tornado FK og Måløy FK. 

Etter økta samla alle seg i klubblokalet på stadion. Der vart det servert pizza som Sparebanken Norge raust spanderte.

Etter matservering fekk spelarane, dei frammøtte trenarane og foreldra høyre litt om korleis nokon av spelarane i Sogndal FK hugsa frå barne- og ungdomsfotballen, og kva som har vert viktig for dei i sine utviklingsløp.

Etter spelarane var reiste heim, gjennomførte Magne Elde, Sebastian Kaldestad og Vidmar Hjellhaug eit mini-trenarforum med mange gode fotballdiskusjonar. Dette vart ei perfekt avslutning på sosialhelga vår i Nordfjord.

- Me er privilegerte som får moglegheit til å vere ute i klubbar i regionen på denne måten. Det er berre vinnarar når ein får til slike tiltak. Det er svært gjevande for oss og våre spelarar å få vere med å bidra med litt inspirasjon i kvardagen ute i klubbane. Blir spelarane og klubbane rundt oss betre vil me også nyte godt av det, seier dagleg- og sportsleg leiar Sebastian Kaldestad.

Tusen takk til deltakarane, Måløy FK for flott vertsskap og ikkje minst til vår generalpartnar Sparebanken Norge som spanderte pizza på alle saman etter økta!